NAIS ni Sen. Robinhood “Robin” Padilla na maamyendahan ang Vaporized Nicotine and Non-Nicotine Products Regulation Act (RA 11900) upang ipagbawal ang isang uri ng kemikal na ginagamit sa vape products at electronic cigarettes.
Sa inihain niyang Senate Bill No. 1918, nais ni Padilla na hindi magamit ang Hexahydrocannabinol (HHC) sa vape products at electronic cigarettes.
Sabi ni Padilla, sa bilis ng paggamit ng mga bagong sangkap, hindi agad nakakatugon ang mga kinauukulang ahensya kaya’t nalalagay sa panganib ang mga kabataang Pilipino.
“Hindi natin maaaring hayaang mauna ang mga mapanganib na substansiya kaysa sa batas. Kapag may bagong produkto na may posibilidad na makasama sa kalusugan at kaligtasan ng ating mga kababayan, lalo na ng kabataan, tungkulin nating kumilos agad,” sey ni Padilla.
Baka Bet Mo: Robin Padilla: Mass shooting sa loob ng paaralan, gawain ba ng bata yun?!
Paliwanag ng senador, ang HHC ay isang “semi-synthetic cannabinoid mula sa tetrahydrocannabinol (THC), na nasa marijuana.”
Aniya, ilang bansa na ang nagbabawal sa HHC products at may ilan na nagsasagawa ng masusing pag-aaral.
“Maraming magulang ang nag-aalala sa pagdami ng mga produktong hindi nila alam kung ano ang laman. Hindi dapat maging eksperimento ang ating mga anak para sa mga bagong kemikal na ipinapasok sa merkado,” dagdag ng senador.
The post Giit ni Robin Padilla: Pampa-‘high’ na kemikal sa vape products ipagbawal appeared first on Bandera.
Article origin: https://bandera.inquirer.net/448849/giit-ni-robin-padilla-pampa-high-na-kemikal-sa-vape-products-ipagbawal
Original author: pdelrosario
